"Сампдория" ҳужумчиси Хесе Родригес "ПСЖ"даги собиқ жамоадоши Килиан Мбаппенинг фаолиятини Мадрид клубида давом эттириш имкониятлари ҳақида гапирди.
Хесе "Реал Мадрид" тарбияланувчиси ва 2010 йилдан 2016 йилгача клуб тизимида бўлган.
"Мбаппе "Реал"дами? Билмайман. Лекин Флорентино Пересни билганим учун айтишим мумкинки, эҳтимол Килиан энди "Реал"га ўта олмайди. Пересга бўлган воқеа ёқмади. Агар Мбаппега клуб эгаси ёки президенти нуқтаи назаридан қараганимда, унинг трансфери бозордаги футболчиларга боғлиқ бўларди. Аммо агар мен фақат истеъдодга қараганимда, иккиланмасдан, кўзим юмилган ҳолда у билан шартнома имзолаган бўлардим", - дейди Хесе.
Мбаппе ўтган ёзда "Реал"га текинга ўтишга яқин келганди, аммо охир-оқибат Париж клуби билан янги шартнома имзолади.
24 ёшли франциялик футболчи жорий мавсумда "ПСЖ" сафида барча турнирларда 30 та ўйинда майдонга тушиб, 30 та гол урди ва 7 та голли узатмани амалга оширди.
