U20 жаҳон кубогига қачон қуръа ташланади?
Ўзбекистон ёшлар терма жамоаси кеча юртимизда ўтаётган 20 ёшли футболчилар ўртасидаги Осиё чемпионати чорак финалида Австралияни муғлуб этиб (пенальтилар сериясида), жаҳон чемпионати йўлланмасини қўлга киритди.

Хабарингиз бор, ушбу ёшдаги жаҳон кубоги Индонезияда бўлиб ўтади. Турнирга қуръа ташлаш маросими эса 31 март куни ушбу мамлакатнинг Бали оролида ўтказилади.

ФИФА қуръадан олдин жамоаларни саватчаларга ажратишда ўзгача йўл тутишга қарор қилди: иштирокчи мамлакатларнинг ушбу ёшдаги терма жамоасининг сўнгги 5та мусобақадаги натижаларини балл кўринишида ҳисоблашга қарор қилди. Бунда ўз қитъасида чемпионликни қўлга киритган жамоалар (АҚШ, Сенегал, Англия, Янги Зеландия, Бразилия ва Осиё чемпиони) қўшимча баллга эга бўлади.

Айни пайтда иштирокчи жамоалар тўплаган очколар ва саватчалар қуйидагича:

1-саватча
Индонезия — 0 (мезбон)
Уругвай — 28.4
АҚШ — 26.8
Франция — 24.2
Сенегал — 24.0
Италия — 21.8

2-саватча
Англия — 21.6
Янги Зеландия — 18.0
Бразилия — 16.8
Эквадор — 15.4
Колумбия — 15.0
Нигерия — 12.4

3-саватча
Ўзбекистон — 6.4
Ироқ — 4.8
Гондурас — 4.2
Фижи — 1.8
Гватемала — 0.6

4-саватча
Доминикан Республикаси — 0.0
Гамбия — 0.0
Исроил — 0.0
Словакия — 0.0
Тунис — 0.0

Кўриб турганингиздек, Ўзбекистон 3-саватчадан ўрин олди. Бу саватдаги Гондурас, Фижи ва Гватемала жамоалари гуруҳда бизга рақиб бўлмайди.

Қуръада 24 жамоа 6 гуруҳга бўлинади. Бир қитъа вакиллари бир гуруҳдан ўрин олмайди.