Футбол бўйича Ўзбекистон Ёшлар Биринчилиги 18-туридан ўрин олган “Қизилқум” – “Пахтакор” учрашувига (0:0) Олий Лига 18-туридан ўрин олган “Бунёдкор” – “Динамо” (2:1) ўйинидан кўпроқ томошабин кирди.

Ёшлар Лигаси 18-туридаги “Қизилқум” – “Пахтакор” учрашувини, ўйин қайдномасига кўра, 612 нафар томошабин бевосита стадиондан кузатиб борган. Айни вақтда, Олий Лига 18-туридан ўрин олган, амалдаги Ўзбекистон чемпиони ҳамда Осиё Чемпионлар Лигаси чорак финалчиси Тошкентнинг “Бунёдкор” ҳамда Самарқанднинг “Динамо” жамоалари ўртасидаги ўйинни Тошкентдаги “Жар” стадионида 521 нафар томошабин кузатиб борган. Бу Зарафшондаги ёш футболчиларнинг ўйинидагидан 91 нафарга камроқ, дегани.

Эътиборли томони, Ёшлар Лигасидаги томошабинлар сони бўйича “Қизилқум”нинг натижаси турнинг энг яхши кўрсаткичи бўлган; айни вақтда, 18-турда томошабинлар сони камлиги бўйича “Бунёдкор” –“Динамо” ўйинидан кейинги ўринни 1201 нафар томошабин билан “Қизилқум” ҳамда “Пахтакор” жамоаларининг асосий таркиблари ўртасидаги ўйин эгаллаган.

Олий Лига ва Ёшлар Лигаси, шунингдек, Ўзбекистон Биринчилиги ва Ўзбекистон Кубоги мусобақалари доирасидаги учрашувлардаги томошабинларнинг сони қандай ва нимага асосан аниқланиши тўғрисида аниқ маълумотлар йўқ. Томошабинларнинг сони қандай қилиб аниқ кўрсатилишига ҳам расмий изоҳ берилмаган.

Маълумот ўрнида, Ўзбекистон Олий Лигаси ўйинлари тарихидаги энг кам томошабин 2003-йили, Олий Лига 16-тур ўйинлари доирасида “Дўстлик” – “Пахтакор” ўйинига кирган (1:6). Ўшанда ўйинни бевосита стадиондан 36 нафар томошабин кузатиб борган.