"Астон Вилла" ярим ҳимоячиси Эшли Янг Англия терма жамоаси сафида бўлажак Европа чемпионати саралашида жамоадоши Олли Уоткинсни кўрмаганидан ҳайратда қолди. Эслатиб ўтамиз, Уоткинс Премьер-лиганинг жорий мавсумида 9 та гол урди ва 5 та голли узатмани амалга оширди.
"Тўғриси, унинг Англия терма жамоаси қайдномасига киритилмагани мени ҳайратда қолдирди. У ўзига ишонч билан кўп гол уради. У жамоага кўп фазилатларни олиб кела олади. Олли "Астон Вилла"да ўйнаётганидан хурсандмиз", - дея унинг сўзларини келтиради TalkSport.
Аввалроқ Уоткинс "Арсенал"нинг трансферлар рўйхатига киритилгани ҳақида миш-мишлар тарқалган эди. Микель Артета жамоаси англияликни ёзда қўлга киритишга ҳаракат қилади.
