Воҳа дербисидан кейинги матбуот анжуманининг иккинчи қисмида "Насаф" жамоаси бош мураббийи Усмон Тошев иштирок этди.

- Кутганимиздек, ўйин жуда қийин кечди. Дербига хос ўйин бўлди. Энг асосийси, биз ғалаба қозонишни уддаладик.

- Чап қанот ўнг қанотга нисбатан фаолроқ ўйнади. Кўпроқ ҳужумлар шу томондан амалга оширилди. Бу сизнинг кўрсатмангиз эдими?
- Бу ҳақда алоҳида кўрсатма бермагандим.

- Ўйин тезкор руҳда давом этаётганда, сиз оғир ўйин кўрсатадиган Бошковични туширдингиз?
- Шишелов енгил жароҳат олгани учун бунга мажбур бўлдим. Лекин у ишончни оқлади. У тепган жарима зарбасидан кейин ҳисобга олдинга чиқиб олдик. У муҳим голга ўз ҳиссасини қўшди.

- Андрей Переплёткинс ўйинга тайёр эмасдими, ёки унинг ўйини сизнинг тактикангизга тушмаяптими?
- "Шўртан"га қарши баҳсда тўпни кўпроқ назорат қилиб турадиган Илҳом Юнусовни туширишга қарор қилдим. Переплёткинс бугунги тактикамга тўғри келмасди.

- Биринчи бўлимда Алишер Юсуповни мажбурий тарзда ўзгартирдингиз. Бунинг тактикангизга таъсири бўлдими?
- Йўқ!

- Авваллари ўз майдонимиздаги ўйинларда ишончли тарзда баҳсни кузатардик. Ҳозир қандайдир хавотир билан кузатмоқдамиз. Сиз "Насаф"га янгича тактика олиб кирмоқчимисиз?
- Рақибга қараб тактика танлаймиз. Ўйинни хавотир ва ҳаяжонда кузатиш фойдали. Қолаверса қолган жамоалар ҳам кучаймоқда.