"Бухоро" - "Металлург" (2:0) ўйинидан сўнг ташкиллаштирилган матбуот анжуманининг иккинчи қисмида мезбонлар устози Тачмурод Агамуродов журналистлар саволларига жавоб берди.

"Гувоҳи бўлганингиздек, дастлабки бўлимда ўйинимиз қовушмади. Бунинг сабаби оддий, МТЖ ўйинлари туфайли юзага келган танаффус футболчиларимизнинг ўйинига салбий таъсир кўрсатган. Уларга ўйин амалиёти етишмади. Иккинчи бўлимда футболчиларимиз анча ўзларига келиб олишди ва учрашувни ижобий натижа билан тугатишди".

"Бизда ҳозир асосий максад барча уй учрашувларда максимум очко тўплаш. Биз шу билан тўхтаб қолмаймиз, ҳали қилинадиган ишлар жуда кўп. Бизни олдинда оғир ўйинлар кутиб турибди. "Бунёдкор" билан анча қийин ўйинга пухта тайёргарли кўрамиз. Ўтган турда "Бунёдкор" мағлуб бўлди ва албатта биз билан ўйинда ўша очколарнинг жойини тўлдиришга ҳаракат қилади. Лекин мен сизларни ишонтириб айтаманки, "Бунёдкор"га ушбу ўйинда анча қийин бўлади. Бу сафар биз осонликча таслим бўлмаймиз, буни аниқ кафолатлайман".

"Жароҳатланганлар масаласига келсак, Алишер Санаев узоқ даволанишдан сўнг эндигина майдонга туша бошлаганди, лекин "Олмалиқ"қа қарши ўйинда у яна оёғини синдириб олди, менимча у энди чемпионат сўнгига қадар майдонга туша олмайди. Нодир Ражабов ҳозир Москвада тиббий кўрикдан ўтмоқда, мутахассислар операция қилиш кераклигини айтишса операция қилдириб келади. Бобур Омонов бир-икки кундан сўнг жамоа билан машғулотларда қатнашишни бошлайди. Умидли ёшларимиздан бири Нозим Умуров операция қилинди, у ҳали бери майдонга тушмаса керак, балки сўнгги турларда ўйнашга рухсат беришгар. Худди шу гап Жамшид Ҳасановга ҳам тегишли", дея гапириб ўтди Агамуродов.