«Наполи» марказий ҳимоячиси Ким Мин Чже клуб билан янги шартнома имзолаши мумкин.
26 ёшли футболчининг амалдаги шартномаси 2025 йилгача мўлжалланган. Жанубий кореялик футболчига Англиянинг бир қанча топ клублари қизиқиш билдиришди, улар 50 миллион евролик товон пулидан фойдаланишни режалаштираётгани ҳақида миш-мишлар тарқалди.
Calciomercato хабарига кўра, «Наполи» ўз юлдузи билан тез орада янги шартнома борасида музокараларни бошлаш ниятида.
Марказий ҳимоячига иш ҳақини ошириш таклиф қилинади ва уни қўйиб юбориш шарти қайта кўриб чиқилади.
Ким Мин Чже ўтган ёзда «Фенербахче»дан «Наполи»га ўтган эди. Жорий мавсумда у Лучано Спалетти жамоасида 35 та ўйинда майдонга тушиб, 2 та гол ва битта голли узатмага муаллифлик қилган.
