Карло Анчелотти бошчилигидаги "Реал"да сўнгги вақтлардаги асосий муаммо ўнг қанот ҳимояси бўлиб қолмоқда. Анчелотти Дани Карвахални тўлиқ қўллаб-қувватлайди, бироқ ўнг қанот ҳимоячиси жуда узоқ вақтдан бери ўз формасида эмаслиги кўпчилик мухлисларга аён. Клуб фахрийси энди аввалги даражасига қайтмаслиги мумкин.
"Қаймоқранглилар"да ўнг қанот ҳимоясидаги муаммоларни ечиш учун учта йўл мавжуд.
Янги ўйинчи билан шартнома тузиш
Ёзғи трансфер ойнасида "Реал" раҳбарияти янги юлдуз қанот ҳимоячисини олиб келиши мумкин. Diario AS хабарига кўра, қисқа рўйхатга Рис Жеймс, Жоау Канселу, Хуан Фойт ва Давиде Калабрия киритилган.
Муаммо шундаки, яхши ўнг қанот ҳимоячиси жуда қиммат ва хабарларга кўра, клуб навбатдаги трансфер ойнасида асосий харидлар сифатида Йошко Гвардиол ва Жуд Беллингемни белгилаб олган.
Милитаони ўнг қанотга ўтказиш
Бундай услубни Анчелотти бу мавсумда икки марта "Вильярреал"га қарши ўйинларда синаб кўрди. Биринчи тажриба ўртача натижа берди, иккинчиси эса муваффақиятли бўлди. Ўшанда Милитао ҳатто гол ҳам урди. Бразилия терма жамоасида Эдер Милитаонинг қанотда ўйнаши одатий ҳод. Баъзи ўйинларда у ҳимояда ҳам, ҳужумда ҳам бирдек фаол ҳаракат қила олади.
Давид Алаба жароҳатидан сафга қайтгач энди асосий таркиб учун кураш янада қизғин кечади. Марказдаги рақобат сабаб балки Анчелотти Милитаони қанотда синаб кўриш эҳтимоли бор.
Ёш Винисиус Тобиасга имкон бериш
2022 йилнинг қишида "Шахтёр"дан ижарага олинган Винисиус Тобиас "Реал"нинг иккинчи жамоаси "Кастилья" сафида Рауль қўл остида супер ўйинлар намойиш этмоқда. 19 ёшли футболчи бу мавсумда жами 32 та ўйинда 5 та голли узатма амалга оширди.
"Барселона"да Алехандро Бальде 18 ёшида Жорди Альба билан рақобатда ютиб чиққанидек, балки Анчелотти "қироллик клуби" таркибида Винисиусга ҳам имконият берар. Чунки Ла Лигада "Барселона" билан орадаги 12 очколик фарқ сабаб масала деярли ҳал бўлган. Бундай вазият ротатция орқали янги футболчиларнинг кучини синаб кўришнинг айни вақти.
Сизнингча жамоага қайси ўзгариш фойда келтиради?
