Нидерландиянинг "Фейеноорд" клуби бош мураббийи ёрдамчиси Йон де Вольф "Аякс" билан мамлакат кубоги ярим финал учрашуви чоғида трибунада ғалаён кўтарган мухлисларга микрофон орқали мурожаат қилди, деб хабар бермоқда The Sun.
"Жин урсин, бу тарафдаги мухлислар, каллангизни ишлатинг! Ҳеч ким майдонга ҳеч нарсани улоқтирмасликка ишонч ҳосил қилинг", - деб қичқирди мураббий.
Ҳакам икки марта учрашувни тўхтатди. Аввалига, майдонда ёнаётган файерлар туфайли ҳосил бўлган тутун, кейин эса “Аякс” ярим ҳимоячиси Дави Классеннинг бошига улоқтирилган буюм тегиб кетгани сабабли. Ҳар икки воқеага “Фейеноорд” мухлислари айбдор.
Роттердам клуби “Аякс”га 1:2 ҳисобида имкониятни бой бериб, Нидерландия кубогидан чиқиб кетди. Амстердамликлар финалда ПСВ билан куч синашади.
