«Металлург» ва «Сўғдиёна» жамоалари бугунгача кучлилар сафида ўзаро 42 та ўйин ўтказган: 18 та учрашувда жиззахликлар, 16 тасида бекободликлар зафар қучган. 8 та учрашувда эса дуранг натижа қайд этилган. Киритилган ва ўтказиб юборилган тўплар фарқи – 58:53, «Сўғдиёна» фойдасига.

Мазкур жамоалар ўртасида қайд этилган энг йирик ҳисоб – 4:0. «Сўғдиёна» 2001 йилда ўз майдонида ҳам, сафарда ҳам бир мартадан шундай ҳисобда зафар қучган. Энг голларга бой ўйин 2014 йили Зоминда бўлган учрашувда кузатилган. Унда дарвозаларга тўққизта тўп киритилган – 5:4.

Ушбу жамоаларнинг Жиззахда ўтказилган сўнгги бешта учрашуви:

01.05.2022. «Сўғдиёна» - «Металлург» 2:0
26.09.2021. «Сўғдиёна» - «Металлург» 2:0
03.11.2020. «Сўғдиёна» - «Металлург» 0:0
21.04.2019. «Сўғдиёна» - «Металлург» 2:1
09.07.2018. «Сўғдиёна» - «Металлург» 0:1

«Сўғдиёна» ҳақида

«Сўғдиёна» футбол клубига 1970 йилда асос солинган. Дастлабки йилларда ДСК (Кўнгилли спорт клуби) номи билан юритилган. 1973-75 йилларда – «Меҳнат», 1975 йилда – «Жиззах», 1976-77 йилларда – «Ирригатор», 1978-81 йилларда – «Бўстон», 1982-85 йилларда – «Звезда», 1986-89 йилларда – «Ёшлик» номлари остида мусобақаларда қатнашиб келган. 1990 йилдан «Сўғдиёна» номини олган жамоа икки марта совриндор бўлган: 1992 йил – бронза медали, 2020 йил – кумуш медаль. Тўрт марта жамоа кучлилар сафини тарк этган. Жамоанинг битта мавсумда энг кўп гол киритган ўйинчиси Алексей Жданов – 18 та гол (1998).

2022 йилда «Сўғдиёна» биринчи марта халқаро майдонда мамлакатимиз шарафини ҳимоя этди. ОФК кубогида жиззахликлар минтақавий финалга чиқишди.

«Сўғдиёна» кучлилар сафида бугунгача 800 та учрашув ўтказган: 274 та ғалаба, 153 та дуранг, 373 та мағлубият. Киритилган ва ўтказиб юборилган голлар нисбати: 1003:1271. Жамоанинг миллий чемпионатларимиздаги энг йирик ғалабаси – 10:0 (1992 йил –«Сурхон»). Энг йирик мағлубияти эса – 1:8 (2000 – «Дўстлик»), 0:7 (1996 – «Навбаҳор», 2009 – «Нефтчи», 2015 – «Локомотив»).