Суперлига 5-тури доирасида ўтказилган водий дербисида «Нефтчи»га имкониятни бой берган «Андижон» клуби устози Александр Хомяков мағлубиятга асосий сабаб нима бўлгани, рақибнинг кучи, захира ва дерби қандай бўлиши лозимлиги ҳақида ўз фикрини билдирди.

«Биринчи таймдаёқ ўз дарвозамиздан иккита тезкор гол ўтказиб юборганимиз учрашув тақдирини деярли ҳал қилганини тан оламан. Бундай рақибга қарши беллашувда тезкор голлар ўтказиб юбориш мағлубият дегани. Биз учрашувдан аввал ҳимояни ушлашга ва биринчи таймда рақибга гол уриш учун имкон бермасликка келишиб олгандик. Аммо, тезкор голлар туфайли биринчи таймдаёқ барча масала ҳал этилди. Шундан сўнг ўйинга қайта олмадик. Рақиб бекорга етакчилар қаторида бормаётганини исботлади. Улар ҳақли ғалабага эришишди», - деди мураббий.

«Барча режаларимиз биринчи таймдаёқ барбод бўлгач, иккинчи тайм жуда қийин кечди. Ўзгартиришлар биз кутган натижани тақдим этмади. Мағлубиятга учраганимизга ўзимиз айбдормиз».

«Дербилар одатда бундай даражада бўлмайди. Бугун фақат бир жамоа устунлик қилди. Дербилар одатда шиддатли ва жанговар тарзда кечади. Бугун ундай ўйин бўлмади. Биз рақибга деярли қаршилик қилмадик. Иккинчи таймдаги устунликдан ҳам фойдалана олмадик. Жамоалар орасидаги тафовут катта. Улар жадвалда етакчилик қилмоқда. Биз эса, ҳозирча ўз ўйинимизни топишга ҳаракат қилмоқдамиз».

«Захирадан тушганлар ҳозир жисмонан тайёр эмаслар. Агар тайёр бўлганларида асосий таркибда майдонга туширар эдим. Уларда ўйин амалиёти деярли бўлмади, шунинг учун ҳозир улар захирадан туширилмоқда. Келгуси баҳсларда бизга ёрдам беришади деб умид қиламан. Хатолар кўп, улар устида ишлаймиз. Ҳали ишлайдиган нарсаларимиз етарлича», — деди Хомяков.