"Реал Мадрид" ярим ҳимоячиси Федерико Вальверде ва "Вильярреал" ярим ҳимоячиси Алекс Баэна ўртасидаги можаро тафсилотлари ўйин якунланганидан кейин маълум бўлди. “Қаймоқранглилар” футболчиси "Вильярреал" футболчилари автобусга чиқиб кетаётган вақтда Баэнага ҳужум қилди.

Marca нашри хабарига кўра, футболчилар ўртасидаги зиддият январь ойидаги кубок ўйинидан бери давом этмоқда. Ўша учрашувда Баэна Вальвердега нисбатан қўпол ўйнаган ва унга бир неча бор ҳақоратомуз сўзларни айтган. Кечаги ўйинда ҳам Алекс яна Федерикога нисбатан "ширин" сўзларини аямаган, охир-оқибат уругвайлик футболчи бунга чидай олмаган.

Эслатиб ўтамиз, кечаги учрашув мадридликларнинг 2:3 ҳисобидаги мағлубияти билан якунланди.