Голландиялик ҳужумчи Клас-Ян Хунтелар «Шалке-04» билан янги шартнома имзолашга шошилмаяти. Лекин футболчи бунинг сабаби пул билан боғлиқ эмас деб таъкидламоқда:

«Улар («Шалке-04») менга ҳали таклиф билан чиқмадилар. Биз, умуман, пул ҳақида гаплашганимиз йўқ, фақатгина спортнинг баъзи-бир жиҳатлари ҳақида гаплашдик холос. Мен ўзимга жамоадан кетиш учун маълум бир сўнгги муддатни қўйганим йўқ, бу менинг «Шалке-04»даги кейинги ўйинларимга боғлиқ», дея Spox нашри футболчининг сўзларидан иқтибос келтириб ўтди.

Шанба куни гельзенкирхенликлар Бундеслиганинг навбатдаги турида чемпионат пешқадамларидан бири «Бавария» билан тўқнаш келадилар. Хунтелар ана шу ўйингача соғайиб, жамоасининг ғалабасига ёрдам бермоқчи эканлигини айтиб ўтди:

«Умид қиламанки, «Бавария» қарши ўйинда майдонга туша оламан. Ўйлашимча, биз уларни мағлубиятга учратадиган пайтимиз келди. Мен ҳозир касал эмасман, фақатгина бурним сал жароҳатланган. Сешанба куни «Олимпиакос»га қарши кечаган ўйинда бироз оғриқ сездим».

Эслатиб ўтамиз, «Шалке-04» ҳозирда Бундеслигада 4-ўринда бормоқда.  Гельзенкирхенликлар сафига 2010 йилда келган Клас-Ян Хунтелар эса ҳозиргача турли мусобақалардаги 87 ўйинда 64 та гол уришга муваффақ бўлган.