Рой Кин «Арсенал»га қарши ўйинда Эндрю Робертсон ва лайнсмен билан бўлган эпизод ҳақида фикр билдирди.

АПЛнинг 30-туридан ўрин олган «Ливерпуль» – «Арсенал» (2:2) учрашувининг танаффус вақтида Робертсон ён ҳакам Константинос Хатзидакисга олдига яқинлашиб, нимадир ҳақида гапира бошлади.

Лайнсмен «Ливерпуль» ҳимоячисининг юзига тирсаги билан уриб юборди. Футболчилар ҳакам Пол Тирнини ўраб олиб, воқеага эътибор қаратишди ва Робертсон ғазаблангани учун сариқ карточка олди.

Киннинг сўзларига кўра, Робертсон биринчи бўлиб ҳакамнинг қўлидан ушлаб олган.

«Мен ҳали бунақасини кўрмадим. Лекин Робертсон... У биринчи бўлиб лайнсменни ушлаб турмадими? Аниқ эмас; ишончим комил эмас. Аммо Робертсон шикоят қилди. У кўпроқ ҳимоядаги ўйин ҳақида қайғуриши керак эди.

Мен Робертсонни бир неча бор кузатганман ва у катта боладек ҳаракат қилмоқда. Фақат ўйнашда давом этиши керак ва асосий эътиборни ҳимоявий ўйинга қаратсин.

У ҳақиқатан ҳам биринчи бўлиб лайнсменни ушлаб олди», - деди «Манчестер Юнайтед»нинг собиқ футболчиси.