«Арсенал»нинг собиқ сардори Сеск Фабрегас жуда оғир дамларни бошидан ўтказганлигини тан олди, лекин ҳозир «Барселона»да эканлигидан хурсанд эканлигини таъкидлаб ўтди.

Испаниялик ҳужумкор ярим ҳимоячи каталонияликлар таркибига ўтган йилги мавсум бошида қўшилганидан сўнг, лондонликлар сафида бўлгани каби деярли ҳар бир ўйинда «бош қаҳрамон»га айлана олмаяпти, чунки «Барса»да «қаҳрамонлар» жуда ҳам кўп, улар орасидан ажралиб чиқиш эса жуда мушкул. Гарчанд, шундай бўлса-да, Фабрегас ўзига ишончи борлигини, вақти келиб ўзининг энг зўр дамларига яна қайтишини таъкидламоқда.

«Мен тўққиз йилдан буён мана шундай топ-клубларда фаолият олиб бораяпман, бундай қийин вазиятларга биринчи ёки иккинчи бора тушаётганим йўқ. Мен доим юзимда табассум билан ўйнайман ва ҳали ҳам ўз қобилиятимга ишонаман», дея Marca нашри футболчининг сўзларидан иқтибос келтириб ўтди.

Сўнгги пайтларда янги мураббий Тито Виланова қўл остида Фабрегас аввалгидан қўпроқ майдонга тушмоқда. Бу нарса, албатта, футболчига ижобий таъсир қилади:
«Мен ўзимни жуда яхши ва бахтли ҳис қилмоқдаман. Мен одамлар айтганига қараганда кўпроқ ўз жамоамнинг ғалабага эришишини хоҳлайман. Гол уриш муҳим, лекин жамоада менинг унга қараганда ҳам муҳимроқ вазифаларим бор», дея футболчи ўз фикрини давом эттирди.

Сеск Фабрегас 7 октябрда азалий рақиблари «Реал Мадрид» билан бўладиган ўйин ҳақидаги фикрларини ҳам билдириб ўтди:
«Чемпион бўлиш жуда қийин, чунки Испания Ла лигаси жуда рақобатбардош чемпионат. Бир неча ҳафтадан кейин «Реал Мадрид» билан бўладиган ўйин анча қийин бўлиши табиий ҳол, лекин биз ўз ўйин услубимизга ишонамиз. Улар чемпионатни яхши бошлашмаган бўлсалар-да, доимо ашаддий рақиб бўлиб қолаверадилар. Улар ҳали ҳам Мадрид, биз уларни биламиз, улар ёмон спорт формасида ёки йўқми, бунинг аҳамияти йўқ. Аввало, биз ўзимизнинг ўйинимизни чиройли қилишимиз керак. Ахир, бутун чемпионатни 100 фоизли натижа билан ўтказиш жуда қийин, уларни ҳам тушуниш мумкин», дея футболчи ўз фикрларига хулоса қилди.