«Қизиллар»нинг бош мураббийи Брендан Рожерс Жо Коулнинг машғулотларга яна қайтганлигини, Лукас Лейванинг эса яқин кунларда қайтмаслигини маълум қилди. Жо Коул мавсум бошидаги «Вест Бромвич»га қарши кечган дастлабки бахсда жароҳат олганди. Рожерс футболчи ҳақида клубнинг расмий веб-сайтига қуйидагича интервью берди:

«Жо жамоавий машғулотларга қайтди. Лекин у асосий ўйинларга тушишдан олдин яна бир қанча муддат ўзини парвариш қилиши, ўйинларга киришиб кетиши керак. У бир неча ҳафта ўйин амалиётидан четда қолиб кетди. Жо Коулни асосий таркибга қўшиш учун ҳали вақт бор, аввал, у спорт формасини тиклаб олиши керак».

Лукас Лейванинг жамоага қайтиши эса кейинги ойнинг бошларигача ҳам амалга ошмаслиги аниқ. Лекин шундай бўлса-да, Брендан Рожерс Лукаснинг тез соғаяётганлигини таъкидлади:

«Лукас аста-секинлик билан соғлигини тиклаб бормоқда. У ҳар куни тиббий ходимлар билан қаттиқ ишлаяпти».