Собиқ «Милан» ҳужумчиси Филиппо Инзаги ва жамоанинг айни пайтдаги бош мураббийи Массимилиано Аллегри иккалаларининг ўрталарида низо келиб чиққанлигини тан олдилар. Жанжал Инзаги мураббийлик қилаётган «Милан»нинг ёш футболчилари шуғулланадиган майдонда келиб чиққан. Уларнинг иккаласи ҳам Milan Channel билан бўлган интервьюда ана шу низога ойдинлик киритиб ўтдилар.

«Ҳеч нарса содир бўлмади, айтарли ҳеч нарса», - дея ўз фикрини давом эттирди Аллегри: «Пиппо билан орамизда ҳеч қандай муаммо йўқ. Аслида, асосий жамоа ва унинг ёшлари ўртасида ажойиб ҳамкорлик бор. Ўша куни у ерда ҳеч қандай оғир сўз ёки ҳақорат бўлгани йўқ, шунчаки, фикрлар аламашилди, холос».

Инзаги ҳам ўз фикрларини билдириб ўтди:
«Аллегри ҳақ, бу нарса бир  дақиқа давом этди, холос. Ёш ўйинчилар ҳеч нарсани сезишмади, чунки ҳеч нарса содир бўлгани йўқ. Биз миланликмиз ва «Милан»ни севамиз. Жамоа ҳозир «ёрдам қўллари»га муҳтож».

45 ёшли ўзига хос тажрибага эга бўлган Аллегри собиқ «Милан» ҳужумчисининг «Сан-сиро»да тажрибасини ортириб, вақти келиб энг яхши мураббийлардан бирига айланиши мумкинлигини таъкидлаб ўтди:
«Умид қиламанки, мен «Милан»да яна анча вақт қоламан. Лекин, бу ерда умрбод қолмоқчи эмасман. Менимча, Пиппода ажойиб мураббий бўлишга етарли бўлган барча хислатлар бор. У ўз ишини яхши жойда бошлади ва ўз ишини ҳозирданоқ уддалай олмоқда».