"Челси" Европа Чемпионлар лигаси чорак-финал жуфтлигининг биринчи даврасида "Реал" меҳмони бўлади. Ушбу жуфтлик ғолибини ярим финалда "Манчестер Сити" ёки "Бавария" кутишидан хабарингиз бор. Ҳар икки жамоа ЕЧЛ ғолиблигини ўзининг муҳим вазифаси сифатида билади. Хусусан, "Челси" АПЛда беқарор мавсумдан кейин 11 ўринни банд этиб турибди. Жамоа катта пулларни трансферлар учун сарфлаган бўлса ҳам, ўзига кела олмади. Унга рақиб бўлган "Реал" олдида эса 6 май куни бўлиб ўтадиган Испания кубоги финали бор. Қолаверса, мадридликлар ички чемпионатни, деярли "Барселона"га бой бериб бўлди. Шу сабабли, ЕЧЛни ютиш, мавсумни ижобий якунлашнинг ягона омили бўлиб қолмоқда.
Жамоалар спорт формалари ҳақида
Фрэнк Лэмпарднинг "Челси"га келиши ҳеч нарсани ўзгартирмади: жамоа ўтган ҳафта "Вулверхэмптон"га имкониятни бой бериб қўйди. ЕЧЛ доирасида "аристократлар" нимчорак финалда "Боруссия Дортмунд"ни турнирдан чиқариб юборганди.
"Реал"га келадиган бўлсак, улар яқиндагина ўз уйида "Вильярреал"га 3-2 ҳисобида таслим бӯлган. Бу эса Анчелотти жамоасини "Барса"дан 13 очко ортда қолиб кетишига сабаб бўлди. Аммо Европа саҳнида "қироллик клуби" ҳали ҳам тенгсиз. "Реал" ўтган босқичда "Ливерпул"ни қақшатқич мағлубиятга учратган. Эндиликда, мадридликлар ЕЧЛни жорий йил ҳам қўлга киритишга умид қилмоқда.
Жароҳатланганлар ҳақида
"Реал" ўтган ўйинида Лука Модрич, Тони Кроос, Эдер Милитао, Эдуардо Камавинга каби юлдузларига дам берганди. Федерико Вальверденинг майдонга тушиши эса сўроқ остида турибди. Негаки, у "Вильярреал" футболчиси Алехандро Баэнани калтаклаганликда айбланмоқда.
"Челси" Мейсон Маунт, Тиаго Силва ва Сесар Аспиликуэта каби футболчиларидан фойдалана олади. Н'Голо Канте ўтган ўйинда захирада қолдирилганди. Аммо Лэмпард бу ишни футболчи соғлини ўйлаган ҳолда қилгани маълум бўлди. Лондон клуби Бенуа Бадиашиле, Пьер-Эмерик Обамеянг, Нони Мадуэке ва Давид Фофана каби юлдузларини ЕЧЛ учун қайдномага киритмаган.
Кимлар порлаши ҳақида
"Челси" Жоау Феликсга катта умид боғлаб турибди. "Ателтико"дан ижарага олинган ҳужумчи "Реал" билан кўп тўқнаш келган ва уларга қарши нима қилиш кераклигини яхши билади.
Рақиб томонда эса катта калибрли футболчилардан Бензема ва Винисиусга кўп нарса юклатилади. Улар "Ливерпуль" билан баҳсда дублга муаллифлик қилганди. Бензема эса жавоб учрашувидаги ягона голни урган.
Мураббийлар фикри
Карло Анчелотти "Челси"га қайтиши ҳақида гап-сўзлар пайдо бўлганди. Аммо мутахассиснинг ўзи бундай қилмоқчи эмаслигини билдирган. У шундай дейди: "Қайтиш? Йўқ, йўқ. Бу гапларни қўйинг. Ўйлашимча, Лэмпарднинг ўзи у ерда ажойиб ишларни амалга оширишга қодир. Мен "Челси"да яхши дамларни ўтказганман. Бу жамоани яхши кўраман. Аммо у ерга бошқа қайтмайман".
Лэмпард "Челси"да ўзига юклатилган вазифани яхши билади. У бу ҳақида шундай дейди: "Мен ҳамма нарса бир кунда ҳал бўлади деб ўйламайман. Яхши натижага эришиш учун сиз майдондаги ўйинни ўзгартиришингиз керак. Хусусан, натижага эришиш мақсадида рақибга кўпроқ тажовуз қилиш, тезлик, аниқлик ва энг асосийси ишонч бўлиши лозим. Футболчилар ҳам буни билиши шарт. Негаки, бусиз ўйинларда ғалаба қозониб бўлмайди. Мен бу ерга ёрдам учун келдим. Қўлимизда кўплаб иқтидорлар бор. Улардан фойдаланиш керак холос".
"Челси"нинг ҳозирги аҳволи ёмон. Мадриддан натижа билан қайтиш ўта мураккаб кечади. "Реал" эса рақиб билан таққослаганда, ўта тажрибали. Анчелоттида лондонликлардан фарқли равишда тажрибали футболчилар бисёр. Шундай экан, бугунги ўйин ҳар қандай ҳисоб билан мезбонлар фойдасига ҳал бўлади.
ИСМАТОВ Ж.
