Грециянинг "Олимпиакос" клуби ҳужумкор ярим ҳимоячи Хамес Родригес жамоани тарк этганини эълон қилди. Томонлар ҳамкорликни тўхтатишга қарор қилишди. “Қизил-оқлар” 31 ёшли колумбиялик футболчига кўрсатган ўйинлари учун миннатдорчилик билдириб, келгусида муваффақиятлар тилади.
Хамес сентябрь ойининг ўрталаридан бери "Олимпиакос"да ҳаракат қилаётган эди. Колумбиялик юнон клуби сафида 23 та ўйинда майдонга тушиб, 5 та гол урди ва 6 та голли узатма берди.
Энди Родригес ўзига янги жамоа қидиради. Европада футболчи бир қатор клубларда, жумладан, "Реал" ва "Бавария"да ўйнагани билан танилган.
Transfermarkt портали мутахассислари Хамес Родригесни 9 миллион еврога баҳоламоқда.
