20- тур доирасидан ўрин олган “Шўртан” – “Динамо” жамоалари учрашувидан кейин уюштирилган матбуот анжуманинг иккинчи қисмида “Шўртан” бош мураббийи Эдгар Гесс журналистларга ўз фикр-мулоҳазаларини билдирди:

- Бугун ҳам биз ўз анъанамизга содиқ қолган ҳолда ҳужумкур ўйин тактикасини қўлладик.  Ўзингиз гувоҳ бўлдингиз, ҳатто биринчи бўлимнинг ўзидаёқ майдонга Таран-Тожиев жуфтлиги ёнига учинчи ҳужумчи – Клишинни ҳам туширдик. “Динамо” жамоаси кутилганидек иккинчи рақам остида ҳаракат қилди. Гарчи, ташаббус шогирдларим томонида бўлса-да, ҳаракатларимизни самарали якунлаш осон кечмади. Негаки, футболда ҳар доим ҳам бутунлай ҳимояга ётиб олган жамоага қарши ўйнаш осон кечмаган. Бугун ҳам шундай бўлди. Якунда ҳаммаси биз учун ижобий бўлганлигидан хурсандман.

Ғалаба нафақат турнир жадвалидаги мавқеимизни мустаҳкамлади, балки йигитларимизни руҳан кайфиятини кўтаришга ҳам муҳим омил бўлиб хизмат қилиши аниқ.  Бундан кейинги учрашувларни ҳам мана шундай руҳда ўтказишда давом этаверамиз.

- Бугун шогирдларингиз юзага келган кўплаб вазиятлардан унумли фойдалана олишмади. Бунга нима сабаб бўлди, деб ўйлайсиз?
- Хабарингиз бор, йигитларимиз ўтган турда “Насаф” билан қийин учрашувда майдонга тушишди. Назаримда, футболчиларимиз руҳан тўлиқ ўзларига келиб улгуришмади, шекилли. Лекин бу ўткинчи, ҳолат ва ўйлайманки, тез орада ҳаммаси ўз изига тушиб кетади.