Ҳозиргина Англия премьер-лигаси 5-тури доирасидаги “Ливерпуль” – “Манчестер Юнайтед” учрашуви ўз ниҳоясига етди. Мазкур баҳсда “қизил иблислар” 1:2 ҳисобида ғалаба қозонишди.
"Ливерпуль" ва "Манчестер Юнайтед"нинг асрлик қарама-қаршилиги юзасидан, Энфилд Роудда АПЛ доирасида навбатдаги ўйин бўлиб ўтди. Унда меҳмонлар кичик ҳисобда ғалаба қозонишга муваффақ бўлишди.
Ўйин шиддатли курашларга бой бўлди. Ҳар иккала жамоа футболчилари катта босим остида ҳаракат қилишди. 39-дақиқада "Ливерпуль" футболчиси Жонжо Шелвининг асаблари бунга дош бера олмади ва оддий вазиятда, майдон марказида иккала оёғи билан Жонни Эвансга қараб сакради. Учрашув бош ҳаками Марк Халси эса ҳақли равишда уни майдондан четлатди.
Камчиликда қолган мерсисайдчилар, иккинчи бўлим бошланиши билан, кутилмаганда ҳисобни очишга муваффақ бўлишди. Глен Жонсон ошириб берган тўпни Стивен Жеррард чамаси 20 метр масофадан "МЮ" дарвозасининг бурчагига жойлаб қўйди 1:0.
Аммо "Энфилд"даги мухлислар қувончи узоққа чўзилмади. Орадан 5 дақиқа ўтгач, тезкор қарши ҳужумда Рафаэл Валенсия Кагава учлиги амалга оширган чиройли комбинациядан кейин Рафаэл яқин масофадан туриб, дарвозанинг юқори бурчагини аниқ нишонга ола билди 1:1.
80-дақиқада эса Валенсия майдон марказидан рақиб жарима майдончасига қадар югуриб борди ва Глен Жонсоннинг оёғига чиройли қоқилиб йиқилди. Бош ҳакам эса бунга лаққа тушиб, пенальти белгилади. Робин ван Перси нуқтадан адашмади 1:2.
Шундан сўнг майдон эгалари харчанд ҳаракат қилишмасин, вазиятни ўнглай олишмади. Ҳатто қўшиб берилган 8 дақиқа ҳам уларга ёрдам бермади.
Англия Премьер-лигаси
5-тур
"Ливерпуль" – "Манчестер Юнайтед" 1:2 (0:0)
Голлар: Жеррард (46) – Рафаэл (51), ван Перси (81, пенальти).
"Ливерпуль": Рейна, Келли, Шкртел, Аггер (Каррагер, 80), Жонсон, Жеррард, Аллен, Шелви, Борини (Сусо, 46), Суарес, Стерлинг (Хендерсон, 66).
"Манчестер Юнайтед": Линдегор, Рафаэл (Уэлбек, 89), Ж. Эванс, Рио Фердинанд, Эвра, Кэррик, Гиггз, Валенсия, Кагава (Х. Эрнандес, 81), Нани (Скоулз, 46), ван Перси.
Огоҳлантиришлар: Скоулз (58), Рейна (77), ван Перси (84).
Четлатиш: Шелви (39).
