"Манчестер Юнайтед" ярим ҳимоячиси Кристиан Эриксен "Ноттингем Форест" устидан қозонилган ғалаба (2:0) учун асосий таркибда жароҳат олган Марсель Забицерни қандай алмаштиргани ҳақида фикр билдирди.
"Менда тайёргарлик кўриш учун кўп вақт йўқ эди. Марсель Забицер жароҳат олгани ҳақида хабар олдим. Менга тайёр туришимни айтишди. Мен бироз вақт ўйиндан ташқарида эдим, шунинг учун тайёргарлик кўришим керак эди.
Мен ўйинимизга осон мос тушаман. Жамоа мени ҳайратда қолдирди, улар шиддат ва савияни сақлаб қолишди. Мавсумни қандай бошлаганимиз билан солиштирганда, ҳозир клубда бутунлай бошқача муҳит ҳукм сурмоқда.
Олдинда ҳали кўп ўйинлар бор, лекин биз бор кучимизни беришни истаймиз. Биз "Севилья"дан қасос олиб, Европа лигасининг ярим финалига чиқмоқчимиз", - деди Эриксен.
Кристиан жароҳатидан фориғ бўлганидан кейин илк бор майдонга тушди. 31 ёшли даниялик ярим ҳимоячи жорий мавсумда “Манчестер Юнайтед” сафида АПЛда 21 та ўйинда майдонга тушиб, 1 та гол ва 7 та голли узатмага муаллифлик қилган.
