"Арсенал"нинг жорий мавсумдаги чемпионлик кураши катта мураккабликларга дучор бўлди. Клуб сўнгги учта ўйинда жами 6 очко йўқотди. Микель Артета шогирдлари "Ливерпуль" ва "Вест Хэм"га қарши баҳсларда олдинда бора туриб, дуранг қайд этган бўлса, кеча, 20 ўриндаги "Саутгемптон"га 3-1 ҳисобида ютқаза туриб, сўнгги дақиқаларда мағлубиятдан қутулиб қолди. Хўш, бу воқеалар "Арсенал"нинг эҳтимолий чемпионлигини йўққа чиқарадими ёки жамоа яна қайта оладими? Ҳа, тўпчиларнинг тақдири ҳали ҳам ўз қўлида. Аммо биринчиликни бой бермаслик учун жамоадан "Манчестер Сити" майдонида ғалаба қозониш талаб этилади. Ҳозирги вазиятга монанд равишда, яқин ўтмишдаги "Арсенал"нинг омадсиз баҳслари ва уларга жамоанинг реакциясини ўргандик. Қуйида шу ҳақида...
"Эвертон"га – 1-0 (2023, февраль)
Артета жамоаси "Гудисон Парк"ни хафа ҳолда тарк этади. Негаки, Шон Дайч ўзининг илк ўйинида етакчи жамоани мағлуб этганди. "Эвертон" ҳимоявий ўйин кўрсатиб, уч очкога эришган эди. Ўшанда Жеймс Тарковскининг ягона голи баҳс тақдирини ҳал қилган. Ўшбу ўйиндан сўнг, "Арсенал" ўз уйида "Брентфорд" билан 1-1 ҳисобида дуранг қайд этади. Орқасидан эса "Манчестер Сити"дан яна бир мағлубият қабул қилиб олади. Шундай қалтис вазиятда Лондон клуби "Астон Вилла" майдонига сафар қилади. Бу баҳсда 2-2 ҳисоби қайд этилаётган бир пайтда, сўнгги дақиқалардаги гол жамоага уч очко тақдим этганди. Айни ўйин еттита ғалабали сериянинг бошланиши эди.
"МЮ"га – 3-1 (2022, сентябрь)
Мавсум аввалроғида "Арсенал" кетма-кет бешта ғалаба билан "МЮ" майдонига ташриф буюради. Эрик тен Хаг жамоаси лондонликларга "совға" тайёрлаб қўйганди. Рақибга кучли босим қила туриб, "Арсенал" қарши ҳужумдан учта гол ўтказиб юборган. Ўйин 3-1 ҳисобида якунига етган эди. Кейинги баҳс ҳам сафарда, "Брентфорд"га қарши кечади. Томас Франк шогирдларига қарши "Арсенал" жавобсиз учта гол уришга эришганди.
"Тоттенхэм"га – 3-0 (2022, май)
"Арсенал" ўтган мавсум охирлаётган даврда ЕЧЛ учун курашаётган эди. Жамоа ўзининг турнирдаги энг ашаддий рақиби ва кучли тўртлик учун рақобатчиси билан тўқнаш келиши керак бўлади. "Арсенал"га ўша ўйиндаги ғалаба ЕЧЛ йўлланмасини тақдим этарди. Ҳаттоки, мағлубият ҳам тақдирини ўз қўлида қолишига сабабчи бўлган. 3-0 ҳисобида таслимиятдан кейин "Ньюкасл"ни ютиш масаласи ўртага чиқади. Аммо Эдди Хау жамоаси Лондон клубидан устун келади – 2-0. Шундай қилиб Артета шогирдлари муҳим йўлланмадан қуруқ қолади. Сўнгги турдаги "Эвертон" устидан қозонилган ғалаба ҳеч нимани англатмас эди (5-1).
"Кристал Пэлас"га – 3-0 (2022, март)
"Арсенал" Патрик Виейра жамоаси билан тўқнашгунга қадар ажойиб натижа қайд этаётган эди. Клуб 5 та ўйинда ғалаба билан қўшни жамоа майдонига ташриф буюради. Аммо "бургутлар" "Арсенал"ни шармандали равишда мағлуб этади. Вазиятни оғирлаштирган нарса, бу ўша ўйиндаги Киран Тирнининг жароҳат олгани ва Томас Партининг сафдан чиққани эди. Асосий футболчиларсиз навбатдаги иккита баҳс ҳам бой берилади ("Брайтон, "Саутгемптон"). Ҳа, учта кетма-кет мағлубиятлардан кейим Микель Артета тўртта баҳсда "Арсенал"ни ғалаба сари бошлади. Бироқ, мавсум сўнггида маълум бўлдики, ўша йўқотилган 9 очко ЕЧЛ йўлланмасиники экан.
"Манчестер Сити"га – 2-1 (2022, январь)
Янги йилнинг илк кунида бўлиб ўтган ўйин мезбонлар учун адолатсиз якун топади. Баҳс Микель Артета жамоасининг катта устунлиги остида ўтган эди. Аммо Родри сўнгги дақиқалардаги голи билан бутун стадионни хафа қилди. Аламли мағлубият кетидан яна мағлубиятлар бошланади. Аввалига "Ноттингем" билан кубок баҳсида муваффақиятсизлик қайд этилди. Кейин эса "Ливерпул"га лига кубогида имконият бой берилди. Камига лигада "Бёрнли"га қарши тўпчилар ҳеч нарса қила олмади – 0-0. Шундан кейин, кучли тўртлик учун курашда кетма-кет 5 та баҳс ғалаба билан якунланган эди.
"Брентфорд"га – 2-0 (2021, августь)
2021-22 йилги мавсум "Арсенал"нинг еврокубокларсиз ўтган сўнгги 20 йил ичидаги илк дами эди. Артетанинг иродаси мавсум аввалида қаттиқ синовдан ўтказилади. Дебютант жамоа бўлган "Брентфорд"га мағлубият, ортидан эса "Челси ва "Манчестер Сити"ларга ютқизиқ, "Арсенал"нинг қўрқинчли туши эди. Жамоа мавсумни 67 йил ичида илк марта мана шундай омадсиз бошлайди. Шундай вазиятда ярага туз сепилади: "Арсенал" 3 та турдан кейин 20 ўринда турган ҳолда, "Тоттенхэм" 9 очко билан жадвални бошқара бошлайди. Аммо "Арсенал" раҳбарияти сабр қилди, Микель Артетага имкон беришда давом этди. 3 та мағлубият кетидан кетма-кет учта ғалаба қайд этилади. Айниқса, "Тоттенхэм"нинг ер тишлатилиши, "Арсенал"ни "шпорлар"дан юқорига олиб чиқади. Шундай қилиб, бир ой ичида "Тоттенхэм" лигада қувиб ўтилган эди.
ИСМАТОВ Ж.
