Эронда ўтаётган ўсмирлар ўртасида Осиё чемпионатининг гуруҳ босқичида қизиқ вазият кузатилди. Бундай ҳолат камдан-кам содир бўлади.
Бугун "В" гуруҳининг 3-тури якунланди ҳамда Ироқ ва Австралия ўсмирлар терма жамоалари бир хил — 7 очко тўплашди.
B - Гуруҳи
| № | Жамоа | Ўйин | Ғалаба | Дуранг | Мағлубият | Т-Н | Очко |
|---|---|---|---|---|---|---|---|
| 1 | Австралия | 3 | 2 | 1 | 0 | 4-1 | 7 |
| 2 | Ироқ | 3 | 2 | 1 | 0 | 4-1 | 7 |
| 3 | Уммон | 3 | 1 | 0 | 2 | 5-6 | 3 |
| 4 | Таиланд | 3 | 0 | 0 | 3 | 2-7 | 0 |
Мусобақани ўтказиш регламантининг 18-моддаси b-бандига кўра, жамоалар хил очко тўплаган ҳолатда, уларнинг ўринлари қуйидагича аниқланади:
А) Гуруҳдаги ўзаро ўйинларда тўплаган очколар сони;
В) Гуруҳдаги ўзаро ўйинлардаги тўплар фарқи;
С) Ўзаро ўйинларда урилган голлар сони;
D) Гуруҳлардаги барча ўйинлардаги тўплар фарқи;
Е) Гуруҳдаги барча ўйинларда урилган голар сони;
F) Бир хил кўрсаткичга эга бўлган икки жамоа майдонда бўлса, асосий вақтдан кейин пенальтилар серияси ўтказилади;
G) Жамоалар олган сариқ ва қизил карточкалар ҳисоби;
Н) Қуръа
Ироқ ва Австралия жамоалари бугун ўзаро дуранг (0:0) ўйнашди ва уларнинг тўплар нисбати 4-1 кўринишда бўлди. Ҳар иккала жамоа Уммонни 2:1, Таиландни 2:0 ҳисобида мағлубиятга учратди. Регламентнинг "А"дан "Е"гача бўлган бандларига кўра, гуруҳ ғолиби номини аниқлашнинг имкони бўлмади. Натижадан "F" банди кучга кирди ва жамоалар майдонда бўлгани учун гуруҳдаги ўринларни аниқлаш мақсадида пенальтилар сериясига навбат берилди. Пенальтиларда эса Ироқ омадлироқ чиқди — 3:2.
Агар ушбу жамоалар сўнгги турда куч синашишмаганда, юқоридаги регламентнинг сўнгги 2 банди кучга кириши мумкин эди.
"В" гуруҳида 1-ўринни эгаллаган жамоа (Ироқ) чорак финалда мусобақа мезбонига тушишдан қутулиб қолиши мумкин, агар Эрон ҳозир бўлаётган 3-тур ўйинида Кувайтга ютқазиб қўймаса. Ўйиннинг 30-дақиқаси ўтиб бораётган пайтда Кувайт 1:0 ҳисобида ғалаба қозонмоқда.
