Россиялик эшкак эшувчи Анна Пракатен Ўзбекистон терма жамоаси сафига қўшилишни хоҳламоқда. Бу ҳақда Россия Эшкак эшиш спорти федерацияси президенти Алексей Свирин маълум қилди, дея хабар қилмоқда “ТАСС”.

Анна Пракатен 30 ёшда. У Россия терма жамоаси таркибида 2021 йилги Европа чемпионати ғолиби бўлган. Шунингдек, академик эшкак эшиш бўйича Токио—2020 Олимпия ўйинлари кумуш медалини қўлга киритган. Анна 2016 йилгача Беларусь шарафини ҳимоя қилган.

“Анна Пракатен Ўзбекистон терма жамоаси сафига қўшилишни ният қилмоқда. Албатта, унинг кетиши жамоамиз учун катта йўқотиш бўлади. Лекин ҳар бир спортчи ўз тақдирини ўзи ҳал қилиши керак. Ҳозир юқори даражадаги спортчиларимиз қийин кунларни бошдан кечирмоқда, мусобақалардан четлатилган вақтда мотивация топиш жуда қийин.

Аня қиш-баҳор мавсумида қисман мустақил, қисман терма жамоа билан шуғулланди. У фаолиятини якунлаш ҳақида ҳам ўйлади, лекин халқаро мусобақаларда иштирок эта олиш учун Ўзбекистон шарафини ҳимоя қилишга қарор қилди.

Биз ўтган йили яхши алоқада бўлган Ўзбекистон федерацияси аввалроқ халқаро майдонда иштирок этиш учун фуқаролигини ўзгартирадиган россиялик спортчиларни қабул қилишга тайёр эканини маълум қилганди.

Ўйлашимча, халқаро федерацияга аллақачон мурожаат қилинган ва бу масала кўриб чиқилган. Агар халқаро федерация буни маъқулласа, спортчининг Ўзбекистон учун кураш олиб боришига тўсқинлик қилишдан фойда бўлмайди.

Бундай спортчилар учун 24 ойлик карантин мавжуд, аммо Халқаро эшкак эшиш федерацияси ижроқўми россиялик спортчилар ҳозирда қандай ҳолатда эканига қараб уни қисқартириши мумкин. Шунинг учун Пракатен Париждаги ёзги Олимпия ўйинларида Ўзбекистон номидан иштирок этиши мумкинлигини инкор қилиб бўлмайди”, — деди Свирин.

Қайд этиш керак, айни вақтда Россия ва Беларусь спортчилари кўплаб халқаро мусобақалар қатори Олимпиада ва унга саралаш босқичини ўтайдиган турнирларда қатнаша олмаяпти. Халқаро Олимпия қўмитаси Украинадаги ҳарбий ҳаракатлар сабаб мамлакат спортчиларини кўплаб мусобақаларга қўймаяпти.