Қатар миллий терма жамоаси мураббийи Паулу Аутори бошчилигида бир ҳафталик ўқув йиғинини ўтказиш мақсадида Абу-Даби шаҳрига йўл олади. Улар 16 октябрь куни бўладиган Ўзбекистонга қарши ЖЧ-2014 саралаш баҳсига тайёргарлик кўришади. Қатар 8 октябрь куни Иордания терма жамоасига қарши ўртоқлик ўйинини ўтказади.

"Олдимизда ЖЧнинг 2та муҳим ўйини турибди", дейди Паулу Аутори матбуот анжуманида. "Биз бу ўйинларга тайёргарликни бошлаяпмиз. БААда ўтказадиган бир ҳафталик йиғинимиз бизга жамоавий руҳни шакллантиришда ёрдаб беради. Шундай йиғин бизга Эрон билан ўйинда ёрдам берганди".

Қатар терма жамоаси ҳозирча саралаш босқичининг "А" гуруҳида 4 очко билан 3-ўринни эгаллаб турибди. Улар сўнгги ўйинни 12 июнь куни Эронга қарши ўтказиб, 0:0 ҳисобидаги дурангга имзо чекишганди.

"9 июнь куни Кореяга ютқазганимиздан кейин Теҳронда дуранг ўйнаганимиз яхши бўлди. Корея билан ўйинда концентрацияни жамлай олмади ва бир нечта хатоларга йўл қўйдик. Ўша ўйиндан кейин футболчиларга хатоларни тушунтирганимдан кейин улар ўз хатоларини тушуниб етишди. Шунинг учун Теҳронда оғир шароитда ўйнашимизга қарамай, жамоа хатога йўл қўймади. Шогирдлари стадион тўла халойиқ қаршисида концентрацияни йўқотиб қўйишмади", дейди Қатар бош мураббийи.

"Биз 9 кун ичида 3та ўйин ўтказгандик. Лекин мавсум давомида кўп ўйинларда иштирок этган футболчиларим жисмоний босимни кўтара олишди. Ҳозир эса бошқача ҳолатдамиз. Футболчилар мавсумни энди бошлашди. Терма жамоанинг баъзи муҳим футболчилари Қатар Юлдузлар лигаси ўйинларида иштирок этишмаяпти. Шунинг учун БААда ўтадиган ўқув-машғулот йиғинида уларнинг формаларини яхши ҳолатга келтириб оламиз. Ўйинчилар ҳам жамоада ижобий муҳит ҳукм суришини исташади", дейди у.

"Умид қиламан, мухлислар стадионга келиб, бизни қўллаб-қувватлашади. Бу биз учун муҳим", дейди бразилиялик Паулу Аутори.