«Манчестер Сити» бош мураббийи Хосеп Гвардиола Англия премьер-лигасининг 34-турида «Фулхэм» устидан қозонилган ғалаба (2:1) ҳақида гапирди.
Мутахассиснинг таъкидлашича, ўйин охирги дақиқаларгача кескин ўтди, аммо бундан бошқачасини кутмаслик керак эди.
«Ўтказиб юборилган голга яхши жавоб қайтардик. Биз яхши ўйнадик, ўсишда давом этдик. Бизга осон бўлмади, чунки рақиб ҳимояда ўзини яхши кўрсатди, жарима майдончасида бу жуда қийин бўлди», - дея Гвардиоланинг сўзларини келтиради BBC.
«Шаҳарликлар» Лондоннинг «Арсенал» жамоасини бир очкога ортда қолдириб, айни пайтда турнир жадвалида пешқадамлик қилмоқда.
«Манчестер Сити» 3 май куни «Вест Хэм»га қарши баҳс олиб боради.
