"Челси"нинг испаниялик ҳимоячиси Сезар Аспиликуэта журналистлар билан суҳбатда Лондон клубининг узоқ давом этган омадсиз серияси ҳақида гапирди.
Аспиликуэтанинг айтишича, ҳозир жамоадаги барчанинг сўнгги натижалардан ҳафсаласи пир бўлган, шунинг учун футболчилар содир бўлган воқеа учун жавобгарликни ўз зиммаларига олишлари керак. Испаниялик футболчининг таъкидлашича, "кўклар" ҳозирги ҳолатда бўлишни кутмаганди.
"Бу "Челси"га келганимдан бери энг ёмон ўйин. Биз бу дақиқаларни бошдан кечиришимиз ва ҳамма нарсани ўзгартиришимиз керак", - дея қўшимча қилди Аспиликуэта.
Эслатиб ўтамиз, Франк Лэмпард қўл остида "Челси" футболчилари кетма-кет олти учрашувда мағлуб бўлишди. Айни дамда "кўклар" АПЛ турнир жадвалида атиги 12-ўринни эгаллаб турибди.
