Бугун тунда АПЛ 28-турининг қолдирилган баҳси доирасида «Брайтон» ҳамда «Ман Юнайтед» кураш олиб боради. Қизиқ томони, «Брайтон» Англия кубогидаги аламли пенальтилар cерияси учун қасос олишга ҳаракат қилиб кўради.

«Брайтон»

Ўтган турда «қизиллар» «Астон Вилла»ни минимал ҳисобда енгган бўлса, Де Зерби шогирдлари «Вулвз» дарвозасига жавобсиз 6 та гол урди. Шунга қарамай ўшанда уч кун аввал жамоа «Ноттингем»га мағлуб бўлган (1:3). Аммо қолдирилган ўйинларни ҳисобга олсак, «чайкалар» бемалол ҳозирги 8-ўрнидан 5-поғонага кўтарилса бўлади. Таъқиб қилаётган жамоалари ҳам анойилардан эмас - «Астон Вилла», «Тоттенхэм» ҳамда «Ливерпуль». Сўнгги беш ўйинда жамоа хоҳ ғалаба қозонса, хоҳ мағлуб бўлмоқда, яъни стабиллик йўқ. Аммо гол уриш борасида муаммолар кўзга ташланмайди. Охирги 21 та учрашувнинг атиги биттасида «Брайтон» рақиби дарвозасини ишғол қила олмаган холос. Жамоа ўз уйида ўтган 2023 йилдаги 7 учрашувнинг 5 тасида ғалаба қозонди - барчасида ўз дарвозаси дахлсизлигини сақлаган ҳолда. Кўрамиз, бугун худди ўша йигитлар «МЮ»га қандай қаршилик кўрсата оларкан?!

«Манчестер Юнайтед»

Ҳар бир сериянинг якуни бўлгани каби «Астон Вилла»нинг ҳам ҳар бир ўйинда гол уриш методи «Олд Траффорд»да иш бермай қолди. Мартинес гўзал сейвлари билан ёдда қолган эрсада, Брунонинг ҳаракатлари олдида ожиз қолди. Ундан олдинги турда эса «қизил иблислар» «Тоттенхэм» билан жанговар дуранг қайд этганди - 2:2. Тўртлик учун курашаётган ортидаги рақибларининг шундоққина нафасини ҳис қилиб турган жамоа бугун меҳмонда ғалаба қозонса, «Ньюкасл»ни ортда қолдириб, 3-ўринга кўтарилиб олади. ЕЧЛ йўлланмасини ички лига орқали ҳимоя қилиш осонроқ. Чунки «Ман Юнайтед» Европа лигасида «Севилья»га имкониятни бой берди ва энди бор эътиборини АПЛга қаратади. Тен Хаг шогирдлари 2023 йил ҳисобидан сафардаги 7 та ўйинда атиги 2 марта ғалаба қозонган. Бундан аввалги «Амекс»да бўлган учрашув «қизил иблислар»нинг йирик 4:0 ҳисобидаги ғалабаси билан тугаган. Бироқ августда ўз майдонида жамоа худди шу рақибига ютқазган (1:2).

Янгиликлар

Де Зербига бугун Модер, Лэмпти, Сармиенто ва Лаллана ёрдам бера олмайди. Шунингдек, италиялик мутахассис Эван Фергюсон билан ҳам таваккал қилмоқчи эмас. «Вулвз»га қарши баҳсда Велтман ҳам жароҳат олган эди. Бироқ унинг жароҳати унчалик жиддий эмас дея айтилмоқда. Сафга қайтганлар орасида Гросс номи мухлисларни хурсанд қилади. Шунингдек, ўтган турни захирада ўтказган Митома, Маккалистер, Кайседо ҳамда Колвил бугунги ўйинда жамоасига ёрдам беришга шай.

«Юнайтед» лазаретида эса Ван де Бек, Гарначо, Хитон, Жонс ҳамда Варандан яхши янгиликлар бор.