Жума куни «Насаф»га қарши ўта муҳим ўйин бўлади. Айни пайтда андижонликлар бу беллашувга ҳар томонлама пухта тайёргарлик кўрмоқдалар.

Бу ўйиннинг нечоғли жиддий аҳамиятга эга эканлигини ортиқча айтиш шарт эмас. Турнир жадвалидаги вазият ҳаммасини кўрсатиб турибди. Кетма-кет тўрт ўйиндаги омадсиз натижа туфайли «Андижон» бироз қийин аҳволга тушиб қолди. Лекин ҳали ҳаммаси тугади дегани эмас. Чунки олдинда бешта ўйин бор. Тўғри, вазият оғир. Аммо мураббийлар ва футболчилар тушкунликка тушмасдан бу ҳолатдан чиқиб кетиш йўлларини қидирмоқдалар. Шу боис бош мураббий Азамат Абдураимов шогирдларини ҳар тарафлама қўллаб-қувватлаб, уларнинг кайфиятини кўтармоқда.

Шу кунгача «Андижон» олий лигада 209 марта ғалаба қозонди. Охирги бор 17-турда ўз майдонида «Қизилқум» устидан 5:1 ҳисобида муваффақият қозонганди. Ўшандан буён «Бургутлар»нинг парвози кўнгилдагидек чиқмаяпти. Хўш, бу сафар 210-ғалабасини қўлга кирита оладими? Албатта, буни вақт кўрсатади. Жамоа аъзолари нафақат ушбу ғалаба учун, балки олий лигада ўз ўрнини сақлаб қолиш учун ҳам охиригача курашмоқдалар.

Ҳозирда орқага йўл йўқ. Жамоа ютишга мажбур! Мана шундай паллада футболчилар ўз ҳарактерини кўрсатишлари лозим. Бу борада «Андижон»га омад тилаймиз.