Бугун ўсмирлар ўртасидаги Осиё чемпионатида ярим финалга чиққан жамоалар бош мураббийлар иштирокида матбуот анжумани ўтказилди. Унда қатнашган Дилшод Нуралиев ярим финалда қайси жамоа билан учрашишнинг аҳамияти йўқ эканини таъкидлаб ўтди.

"Мусобақанинг ушбу босқичида у ёки бу жамоага устунлик бериб бўлмайди. Эрон яхши ўйин кўрсатади. Боз устига, эртага мухлислар уларни кучли қўллаб-қувватлашади. Лекин ишончим комил, Эронга қарши ярим финал ўйинида чорак финалда Кореяга қарши ўйинга нисбатан самарадорлигимиз юқори бўлади", дейди Нуралиев.

Ўзбекистон ўсмирлар терма жамоаси чорак финалда Корея дарвозасини 64-дақиқада ишғол қилди. Ўйинга қўшиб берилган қўшимча дақиқада эса Хванг Хи Чан ҳисобни тенглаштиришга муваффақ бўлди. Пенальтилар сериясида эса омад ўзбекларга кулиб боқди. Тақдир тақозоси туфайли 5та гол билан мусобақа тўпурари бўлиб турган Хванг Чи Хан пенальтилар сериясида гол ура олмади.

"Биз ўйинни асосий вақтда ўз фойдамизга ҳал қилмоқчи бўлгандик. Агар иккинчи бўлимда юзага келган имкониятлардан фойдалана олганимизда, асосий вақтнинг ўзида ғалаба қозонган бўлардик. Шундай бўлса-да, Жаҳон чемпионатига чиққанимиздан хурсандман. Биз энди мусобақада ғолиб чиқмоқчимиз", дейди ўсмирларимиз бош мураббийи.