«Челси» ярим ҳимоячи Мэйсон Маунт билан шартномани узайтириш борасида музокараларни давом эттирмоқда.
Evening Standard хабарига кўра, 24 ёшли ярим ҳимоячи Лондон клуби раҳбариятидан жамоадаги бошқа тажрибали футболчилар қаторида бир хил маош сўраган. Масалан, янги шартномага кўра, ҳимоячи Рис Жеймс йилига 15,2 миллион евро олади. Мэйсон ҳам тахминан шунча хоҳлайди.
Аввалроқ ОАВда «Челси» раҳбарияти футболчини жамоада сақлаб қолиш учун бор кучини ишга солиш ниятида экани ҳақида маълумотлар пайдо бўлганди.
Қайд этилишича, Маунтнинг ўзи ҳам «кўклар» лагерида қолишни истамоқда, чунки салоҳиятли бош мураббий Маурисио Почеттино уни янги жамоасининг асосий футболчиси сифатида кўрмоқда.
Маунт жорий мавсумда барча мусобақаларда 35 та ўйинда майдонга тушиб, 3 та гол урди ва 6 та голли узатмани амалга оширди.
Ярим ҳимоячининг «Челси» билан шартномаси 2024 йилнинг ёзида якунига етади.
