"Милан" бош мураббийи Стефано Пиоли Рафаэль Леаунинг жароҳати ва унинг Чемпионлар лигаси ярим финалининг жавоб учрашувида иштирок этиши мумкинлиги ҳақида фикр билдирди. У бошқа футболчиларнинг ҳолати ҳақида ҳам маълумот берди.
"Бизда "Специя"га қарши ўйинда Леау йўқлиги каби кичик муаммолар мавжуд бўлиши мумкин. Аммо у якшанба куни машғулот ўтказиб, "Интер"га қарши ўйинга тайёр бўлиши учун яхши имконият бор.
Златан ва Флоренци ҳамон сафда эмас, Крунич ва Мессиас ҳам "Специя"га қарши ўйинда майдонга туша олмайди.
Беннасерни йўқотганимиз ҳам ёмон бўлди. Аммо жароҳатлар бизнинг ишимиз билан боғлиқ хавфларнинг ажралмас қисмидир. Исма кучли характерга эга ва у руҳий жиҳатдан бардошли, шунинг учун у янада кучлироқ бўлиб қайтишига ишонаман", - дея Пиоли сўзларини келтиради Football Italia.
Эслатиб ўтамиз, ўтган шанба, 6 май куни Италия А серияси доирасидаги "Лацио"га (2:0) қарши ўйинда Леау сон мушакларидан жароҳат олган эди.
