"Барселона" ярим ҳимоячиси Гави фаолиятини АПЛда давом эттириши мумкинлиги ҳақидаги хабарларни рад этди.

Аввалроқ, 18 ёшли испаниялик футболчига "Челси" ва АПЛнинг бошқа бир қатор клублари қизиқиш билдираётгани ҳақида хабар берилганди.

"Мен биринчи лига чемпионлигини қўлга киритдим, "Барселона" менинг орзуимдаги клуб. Умид қиламанки, мени бу жамоа билан яна кўплаб ғалабалар кутиб турибди”, деди Гави клуб телевидениесига берган интервьюсида.

Гави "Барселона" тарбияланувчиси. 2022/23 йилги мавсумда футболчи барча мусобақаларда жамоаси сафида 45 та ўйинда майдонга тушиб, 2 та гол урди ва 6 та голли узатмани амалга оширди.