"Барселона" футболчиси Ламин Ямал тарихдаги энг ёш Испания чемпиони ҳисобланади.
15 ёшли вундеркинд апрель ойи охирида Хави Эрнандес жамоасидаги дебютини ўтказди ва Ла Лиганинг "Реал Бетис"га қарши ўйинида (4:0) захирадан майдонга тушди.
14 май куни “Барселона” “Эспаньол”ни мағлуб этиб (4:2) муддатидан аввал чемпионликни қўлга киритди. Шундай қилиб, MisterChip маълумотларига кўра, Ямал Испания олий дивизионида ғалаба қозонган энг ёш футболчига айланди. Аввалги рекордчи Марк Муньеса (17 ёшу 51 кун) эди, у ҳам фаолиятини бошида “Барселона” шарафини ҳимоя қилган, ҳозир эса Қатарнинг “Ал Араби” жамоасида ўйнайди.