Бокс бўйича Тошкент мезбонлик қилган жаҳон чемпионати доирасида Халқаро бокс ассоциацияси (IBA) томонидан ушбу спорт турининг оммавийлигини янада ошириш бўйича бир қатор тадбирлар ташкил этиш кўзда тутилган эди.
13 май куни IBA раҳбарияти “Ҳумо арена” муз саройида иштирокчи давлатларга бепул бокс қўлқоплари тарқатиш акциясини ўтказди. Бунинг натижасида жараён давомида кичик тартибсизлик юзага келди.
Иштирокчи давлатларнинг спортчи ва мураббийлари, мухлислар навбат кутмасдан бепул тарқатилаётган қўлқоплар томон тартибсиз ҳаракатланишди. Бу ҳолатда юзага келган вазият ижтимоий тармоқларда турлича талқин қилинмоқда.
Ўзбекистон бокс федерацияси бу борада шуни маълум қиладики, ушбу ҳолатда ҳеч қандай муштлашув ёки бошқа кўнгилсиз ҳолат рўй бермаган. Вазият қисқа фурсат ичида ҳуқуқ-тартибот органлари томонидан назоратга олинди.
