“Барселона” Ла лигада ўзининг 27-чемпионлигини нишонлади.
 
Бундан тўрт-беш йил муқаддам "Барселона" дея аталмиш клуб учун бу соврин бугунгидек қадрли эмасди. Мана, жамоада бир неча йиллар давомида олиб борилган тозалаш тадбирлари ва авлодлар алмашинуви ўз самарасини бера бошлади.

Ҳа, фақатгина Ла лига соврини холосми, дерсиз, лекин бу чемпионликнинг қадри олийдир... сабаби бугунги “Барселона” шахсларга эмас, жамоавий ўйинга қурилган бўлиб, камига Мессисиз чемпионликка эришди.

Барча ғалабалар замирида Хавининг қўли бор, албатта, тўғри тизим танлай билди, Сетьен, Куман даврида олиб келинган митти юлдузчалар Хави даврида қуёшдай порлаб кетишди. “Барса” билан хайрлашган Пике ўрнига ундан ҳам кўра залворлироқ кўринган Рональд Араухо ҳимояда ишончни оқламоқда. Иньеста ва Хави давомчиси бўлмиш Педри, Гави келди.

Ҳужумда эса Рафинья ва Дембела ўз позицияларида мавсумнинг икки қисмида асосий ишни бажариб беришди. Лева хоҳлаган клубда тўпурар бўлишга қодирлигини биламиз.

Биргина “Месси давомчиси” деб айтилган Ансу Фатига стабиллик, руҳий барқарорлик камдек туюлмоқда. Шундай бўлса-да, “кўк-анорранглилар” чемпион бўлишгани аҳамиятга молик ҳолатдир.

Агарда Хави тузган тизим ила ишлар олиб борилса, олдинги қудратини тиклашга шахсан менда шубҳа йўқ, мисол учун "Арсенал" ҳақида ҳам шундай фикр билдирса бўлади, гарчанд улар Премьер лигада пешқадамликни ўз қўллари билан Ситига беришган бўлса-да…

Ушбу жамоаларнинг ўйинида тизим бор, аниқ мақсад ва режалар бор. Ушбу режаларни амалга оширишда бевосита роль ўйновчи ўйинчилар шакллантирилса бўлди. Мен кўриб турган бугунги "Барса"га Месси кераксиздек туюлмоқда. Ҳа, Месси клубдан-да катта фигура, лекин юқорида айтганимдек, жамоа шахслар орқали эмас, тизим орқали қурилиши муҳим ҳозир.

Гвардиолага яқин футбол инфратузилмасини ҳозирда унинг шогирдлари Хави ва Артета шакллантираётгандек туюляпти.

Хайрулла Ҳамидов.