Пьер-Эмерик Обамеянг Габон терма жамоасига қайтишини маълум қилди.
Ҳужумчининг сўзларига кўра, у мамлакат президенти билан суҳбатлашгандан сўнг термадаги фаолиятини давом эттиришга қарор қилган.
Эслатиб ўтамиз, 33 ёшли тўпурар ўтган йилнинг май ойида Габон терма жамоасидаги фаолиятини якунлаганини эълон қилган эди. Обамеянг терма жамоа таркибида 73 та ўйин ўтказиб, 30 та гол урган.
Обамеянг жорий мавсумда «Челси»да ўйнамоқда. Англия премьер-лигаси доирасида ҳужумчи 15 та ўйин ўтказиб, битта гол урган.