"Реал Мадрид" бош мураббийи Карло Анчелотти Бразилия терма жамоасини бошқариши мумкинлиги ҳақидаги миш-мишларга қарамай, келаси ёзда жамоани тарк этиш ниятида эмас.
“Ҳеч ким мендан шубҳаланмайди. Ўйлайманки, Президент 15 кун олдин келаси йил ҳам биргаликда яна бир қадам ташлашимизни аниқ айтган эди. Келгуси мавсумда мен яна Чемпионлар лигаси учун курашиш учун шу ердаман", — дея Анчелотти сўзларини келтиради журналист Фабрицио Романо ижтимоий тармоқдаги саҳифасида.
17 май, чоршанба куни Чемпионлар лигаси 1/2 финалининг жавоб учрашуви бўлиб ўтди ва унда Мадриднинг “Реал” клуби сафарда “Манчестер Сити”га 0:4 ҳисобида мағлуб бўлди ва турнирдан чиқиб кетди. 9 май куни Мадридда бўлиб ўтган биринчи ўйинда кучлар тенг келганди. Учрашув дуранг билан якунланди - 1:1.
"Сити" 10 июнь куни Истанбулда Чемпионлар лигаси финалида "Интер"га қарши майдонга тушади.