"Манчестер Сити" сафида "Реал Мадрид" дарвозасига ҳимоячи Рубен Диаш ва дарвозабон Эдерсондан ташқари барча футболчилар камида битта зарба амалга оширди. Бу ҳақда Opta Sports хабар бермоқда.

Бир неча дақиқа олдин Чемпионлар лигаси 1/2 финалининг жавоб учрашуви якунига етди ва унда “Манчестер Сити” ўз майдонида “Реал”ни 4:0 ҳисобида мағлуб этиб, турнир финалига йўлланма олди. Биринчи бўлимда "Сити"нинг португалиялик вингери Бернарду Силва дубль қайд этган бўлса, иккинчи бўлимда Эдер Милитаонинг автоголи ҳисобни йириклаштирди ва Хулиан Альварес финал ҳуштагига яқин ўйинга нуқта қўйди. 9 май куни Мадридда бўлиб ўтган биринчи ўйинда кучли аниқланмаганди. Учрашув дуранг билан якунланди - 1:1.

Финалда “Манчестер Сити” Миланнинг “Интер” клубига қарши майдонга тушади.

Турнирнинг ҳал қилувчи баҳси 10 июн куни Истанбулда бўлиб ўтади.