УЕФА президенти Мишель Платини ушбу ҳафтада Марказий Осиё мамлакатларига сафар қиладиган бўлди. У ўз сафарини эртага Қирғизистондан бошлади. Платини Бишкекка Озарбойжондан учиб келади. Хабарингиз бор, у ерда ё7 ёшли қизлар ўртасидаги Жаҳон чемпионати якунига етди. Қирғизистонга ташриф давомида УЕФА раҳбари мамлакат футбол федерацияси президенти билан учрашади ва кечки маҳал соат 18:30да "Олға" ва "Олой" жамоалари ўртасидаги "Афсона кубоги" баҳсини кузатади.
10 октябрь куни эса Мишел Платини Тожикистонга ташриф буюради. Ушбу ташриф давомида у мамлакат раҳбари ва ТФФ президенти билан учрашув ўтказади.
Шундан сўнг, УЕФА президенти 11 октябрь куни Ўзбекистонга ташриф буюриши кутилмоқда. Бу ҳақда ЎФФ расмий сайти қуйидагича ёзади:
"Европа футбол уюшмалари иттифоқи – УЕФА президенти Мишель Платини 11-12 октябрь кунлари Тошкентда бўлади.
УЕФА президенти Мишель Платини 11 октябрь куни Тошкентга ташриф буюради. Куннинг иккинчи ярмида нуфузли меҳмон ЎФФ президенти ҳамда Ўзбекистон Республикаси бош вазири билан учрашади. Шунингдек, кун давомида «Пахтакор» ва янги қуриб битказилган «Бунёдкор» стадионларида меҳмон бўлади.
Ташриф давомида Европа футбол иттифоқи раҳбарига УЕФА Ижроқўми аъзоси Мариос Лефкаритис, УЕФА президенти маслаҳатчиси Паскаль Торрес, УЕФА президенти ёрдамчиси Моника Мхитарян ва Озарбойжон футбол федерациялари уюшмаси бош котиби Элхан Мамадов ҳамроҳлик қилади. Платини бошчилигидаги делегация 12 октябрь куни, куннинг биринчи ярмида Тошкентдан Туркманистон пойтахти – Ашхобод шаҳрига жўнаб кетади.
2012 йилнинг май ойида Венгрия пойтахти – Будапешт шаҳрида ташкил этилган ФИФА конгрессида ЎФФ президенти Мираброр Усмонов ҳамда УЕФА раҳбари Мишель Платини иштирокида учрашув бўлиб ўтганди. Платинининг Тошкентга бўлажак ташрифи айнан ўша учрашувдаги самимий таклиф сабаб амалга ошади".
Мазкур визитларнинг аниқ мақсади ҳозирча маълум қилинмаган. ОАВ ёзилишича, Мишель Платини 2015 йили бўлиб ўтадиган ФИФА президентлиги учун ўз номзодини қўймоқчи ва мазкур визит давомида у Марказий Осиё давлатларидан ўзига овоз беришни сўрамоқчи.
