Суперлига 12-турида “Сурхон”ни мағлуб этган “Пахтакор” клуби бош мураббийи Максим Шацких ғалаба, рақибларнинг жамоасига қарши қандай ўйнаши, захира ва ёшлар ҳақида фикр билдирди.

“Бугун бироз катта ҳисобда ютишимиз учун этарли имкониятлар бўлди. Қизиқарли ўйин бўлди, дейиш мумкин. Асосийси навбатдаги уч очко. Мусобақа жадвалига қарамасликка ҳаракат қиламиз. Бизнинг ўз мақсадларимиз бор. Бошқаларга қараб иш қилмаймиз”, - деди Шацких.

“Сурхон” ёш, тиришқоқ ва чаққон жамоа. Улар биринчи таймда биздан анча тезроқ ўйнашди. Иккинчи таймда эса, биз улардан яхшироқ ўйнадик. Ҳозир барча бизга қарши максимал куч билан ўйнайди. Ҳеч бир ғалаба осон бўлмайди. Биз ҳам қийинчилик эвазига ютаяпмиз”.

“Албатта, ёшларнинг ўрни жамоамизга билинаяпти. Бугун захирамизда фақат У-19 терма жамоасидан футболчилар бор. Уларни майдонга тушириб босим остида қолишларини истамадим. Ҳолматов билан ҳам шундай ҳолат. Уни тушириб таваккал қилишни истамадик. Захирадан майдонга тушган футболчилар ўйинга киришиб кетишлари қийин бўлиши мумкин. Шу боис, бугун ёшларни захирада қолдирдим”

“Файзуллаевнинг йўқлиги ҳам билинаяпти. Ундаги креативлик бизга этишмаяпти. Унинг жамоада қолиши ёки қолмаслиги масаласи ҳақида фикр билдира олмайман. Аммо, айтишим мумкинки, ҳеч кимнинг хоҳишига тескари иш тутмаймиз”.