Ўзбекистон кубоги «Е» гуруҳи 3-тури доирасида «Динамо» Тошкентнинг «Локомотив» клубини қабул қилади. Икки жамоа ҳам муддатдан аввал 1/8 финалга йўлланма олган, бу ўйинда гуруҳ пешқадами номи маълум бўлади.
«Динамо» ва «Локомотив» чемпионат тарихида ўзаро 29 марта тўқнаш келган. «Динамо» 12 ўйинда ғолиб бўлган, 5 ўйин дуранг ҳисобида якунланган. «Локомотив» «Динамо»ни ҳозирга қадар 12 марта мағлуб эта олган. Тўплар нисбати «Локо» томонида – 40:42. Ўзаро ўйинларда «Динамо» 41, «Локомотив» ҳам 41 очкони қўлга киритган.
«Локомотив»нинг ўзаро ўйинларда қозонган энг йирик ғалабаси – 5:1 га тенг. «Динамо»да бу кўрсаткич янада каттароқ – 5:0. 2009 йилги баҳсда Азамат Абдураимов бошчилигидаги «Динамо» Илҳом Юнусов, Дэвид Ония, Андрей Акопянц, Эркин Бойдуллаев, Баҳодир Насимовнинг Филимонов дарвозасига киритган голлари эвазига «Локо»ни 5:0 ҳисобида мағлуб этган.
«Динамо» сўнгги марта 2022 йилда «Локомотив»ни Самарқандда мағлуб этган – 3:1. Тошкентда эса бу йил 0:0 ҳисоби қайд этилган.
