“Пахтакор”га қарши ҳал қилувчи ўйинга ҳозирлик кўраётган “Насаф” футболчилари кеча ўз қароргоҳларида назорат учрашувида майдонга тушишди.
Асосий жамоага спарринг рақиб сифатида Ўзбекистон биринчи лигасида иштирок этаётган “Насаф-2” жамоаси танланди. Таъкидлаш жоизки, ушбу учрашувда мураббийлар штаби бир қатор тактикаларни амалда синаб кўриш имконига эга бўлишди.
Ўз навбатида “Насаф-2” жамоаси ҳам асосий жамоага муносиб қаршилик кўрсатишга ҳаракат қилди. Биринчи бўлимда ҳисоб очилмаган бўлсада, иккинчи бўлимда кутилмаганда “Насаф-2” аъзоси Рустам Жўраев жамоасини олдинга олиб чиқди. Аммо орадан кўп ўтмай тиниб-тинчимас Илҳом Юнусов мувозанатни тиклади. Натижада ўйин шу ҳисоб билан ўз якунига етди.
