“Манчестер Сити” бош мураббийи Хосеп Гвардиола мураббийлик фаолиятидаги 35-кубогини қўлга киритди.

10 июнь куни “Сити” Чемпионлар лигасининг 2022/23 йилги мавсуми финалида “Интер”ни 1:0 ҳисобида мағлуб этди.

MisterChip хабарига кўра, мураббийлик совринлари сони бўйича 52 ёшли Гвардиола Мирча Луческуга етиб олди ва руминиялик мутахассис билан иккинчи ўринни бўлишиб турибди. Шу билан бирга, испанияликнинг мураббийлик фаолиятини бошлаганига 14 йил бўлди, Луческу эса 42 йилдан бери мураббийлик қилмоқда.

Мураббийлар ўртасидаги унвонлар сони бўйича рекордчи - Сэр Алекс Фергюсон - фаолиятининг 39 йилида 49 та соврин.

Чемпионлар лигасидаги ғалабалар сони бўйича Гвардиола Зинедин Зиданга етиб олди (3). Ундан мураббийлар орасида фақат Карло Анчелотти (4) кўпроқ ЕЧЛни ютган.