Хорватия терма жамоаси ярим ҳимоячиси Лука Модрич Нидерландияга қарши бўлиб ўтадиган Миллатлар лигаси яримфиналидан олдинги фикрлари билан ўртоқлашди.
"Нидерландияга қарши ўйин қийин бўлади. Бизни юқори савияга қайтган, ўз уйида ўйнайдиган кучли футболчилардан иборат ёш жамоа кутиб турибди. Яхшиямки, кўплаб мухлисларимиз бизни қўллаб-қувватлашади ва бу қўшимча мотивация беради.
Финал турнирида иштирок этиб, энг яхши жамоаларга қарши ўйнаганимиздан жуда хурсандмиз. Ўтмишга назар ташлайдиган бўлсак, биз мавсумни унчалик яхши бошламадик, Австрияга мағлуб бўлдик, аммо кейин яхшироқ ўйнашни бошладик. Кейинчалик биз Франция ва Данияни мағлуб этдик, бу биз ҳақимизда кўп нарсани айтади", - деди Модрич УЕФА матбуот хизматига.
