"Барселона" вингери Рафинья Диас бош мураббий Хави Эрнандеснинг жамоадаги ўрни ҳақида гапирди.
Эслатиб ўтамиз, яқинда испаниялик мутахассис 2019 йилдан бери илк бор Ла Лига чемпионлигини қўлга киритганди.
"Бизда "Барселона" қандай ўйнашини яхши биладиган мураббий бор. У клубни бошидан охиригача билади. Хави жамоамизнинг ҳозирги ўйинчилари билан нимага эриша олишини билади. Келгуси мавсумдаги мақсад Чемпионлар лигасида ғалаба қозониш", - деди Рафинья Barca Universal билан суҳбатда.
Аввалроқ "Барселона" Рафиньяни шу ёзда 90 миллион евролик таклиф тушган тақдирдагина сотишга рози бўлиши маълум қилинганди. Эслатиб ўтамиз, бир йил аввал каталонияликлар бразилиялик учун "Лидс"га тахминан 55 млн евро тўлаганди.
