2022-23 йилги мавсум "Барселона" учун ғалати кечди. Ҳа, жамоа орадан тўрт йил ўтиб, яна Ла-лигада тенгсизга айланди. Аммо ҳали ҳам жамоа атрофида кўзилғамас жарлик ва тартибсизлик бордек туюлади. Айниқса, Месси Каталонияга қайтмаётгани, буни яққол ифода этди. Жамоа таркиби янгиланишларга муҳтож, бир қанча футболчилар эндиги режаларга тўғри келмай қолган. Ўйинчи сотиб олиш керак, аммо клуб ҳисоб-рақамида етарлича пул мавжуд эмас. Буларнинг бари "кўк-аноррангилар"ни бир жойга: текин трансферлар томон етаклайди. Ёзда кўплаб яхши футболчилар эркин агентга айланади. Уларни текинга олиб келиш мумкин. Шунда фақатгина битта муаммо, уларга тўлаш керак бўлган маош масаласи қолади. Қуйида "Барса"га керак юлдузларнинг айримлари қайд этилади.
1. Илкай Гюндоган
Ҳар қандай клуб Гюндоган каби футболчига эгалик қилишни истайди. Бу мавсумда ярим ҳимоячи "Манчестер Сити"нинг кўплаб муҳим голларига муаллифлик қилди. Немис футболчиси Англия кубоги финалида "МЮ"га иккита гол уриб, жамоасини чемпионга айлантирган эди. "Шаҳарликлар" шундай ўйинчини қўйиб юбормаслиги аниқ. Аммо Гюндоган барибир кетадиган кўринади. "Барселона" эса текин имкониятдан фойдаланиб қолиши керак.
2. Маркус Тюрам
Тюрамнинг эркин агентга айланиш аниқ ва равшан нарса. Аммо унинг кейинги манзили борасида аниқ тасаввурлар мавжуд эмас. Ҳужумчи "Боруссия Мюнхенгладбах"да ажойиб мавсум ўтказди. Француз футболчисига "Милан" қизиқиш билдирган. Аммо улар Тюрам учун "Барселона" билан жанг олиб бориши керак. Тюрам Каталонияда Ферран Торрес ўрини эгаллай олади.
3. Роберто Фирмино
Фирминода Гюндоган ва Тюрамда мавжуд хусусиятлар жамланган. Бразилиялик ҳужумчи "Барса"га керак нарсани бера олади. Айни дамда футболчининг кейинги манзили борасида аниқ маълумотлар мавжуд эмас. Аммо Фирмино исталган топ-клубда ўйнаб кета олади. Текин ҳужумчини "Барса" қўлдан чиқармасликни ўйлаши керак.
4. Мусса Дембеле
Дембеле анчадан бери "Лион"дан кетиш кайфиятида юрган эди. Бунга фақатгина футболчининг шартномаси тўсқинлик қилган. Агарда "Барса" уни кўндира олса, жамоа Левандовски билан деярли бир хил кучга эга ҳужумчига эга бўлади. Яна бир текин ST!
1. Анхель Ди Мария
"Ювентус" вакили Ди Мария "кекса синьора" сафида қийинчиликларга дуч келди. Аргентиналик ҳужумчи, энг аввало жароҳатлардан, кейин эса Массимилано Аллегрининг прагматик ғояларга йўғрилган ўйинидан чарчаган эди. Шунга қарамай, Анхель керак пайтда "Ювентус"га катта ёрдам бериб, жамоани ЕЛ ярим финалига олиб чиққанди. "Барселона" шундай супер-юлдуздан ҳеч бўлмаса, яна бир мавсум фойдаланиб қолиши мумкин. Бунинг учун бир қадам кифоя. Ўша қадамни Хави қўйиши керак.
ИСМАТОВ Ж.
