“Бунёдкор” – “Навбаҳор” учрашувидан кейинги матбуот анжуманининг биринчи қисми наманганликлар устози билан ўтди.

- Ҳозирги пайтда биз учун ҳар бир очко қимматли. Барча футболчиларимиз сўнгги дақиқаларгача кураш олиб боришди. Тўп дарвозамиз чизиғини кесиб ўтдими ёки йўқми буни аниқ тасдиқлай олмайман. Ҳакамлар ишини таҳлил қиладиган назоратчилар бор. Бироқ биз ҳеч бўлмаса дурангни сақлаб қолишга умид қилгандик. “Бунёдкор” – жуда кучли жамоа. Уларга қарши ўйнаш осон эмас. Бугун ўйин давомида футболчиларимизнинг кўзлари ёнди. Шогирдларимга ҳеч қандай эътирозим йўқ, - деди Мустафо Байрамов.

- Олдинда “Навбаҳор”ни жуда қийин ўйинлар кутиб турибди. Мавсум сўнггига жамоангизни қандай тайёрлаяпсиз?
- “Навбаҳор” ҳеч қачон олий лигадан тушиб кетмаган. Биз бу анаъанани сақлаб қолишга ҳаракат қиламиз. Шу боисдан ҳам ҳар бир ўйинда то сўнгги дақиқагача кураш олиб борамиз. Кейинги турда “Локомотив”га қарши меҳмонда ва ўз майдонимизда “Шўртан”га қарши жон жаҳдимиз билан ўйнаймиз.

- Сиз бугун “Бунёдкор” билан дуранг ўйнай олишингизга ишонармидингиз?
- Ҳа, “Бунёдкор” кучли жамоа бўлишига қарамасдан биринчи даврада улардан очко тортиб олгандик. Бугун ҳам футболчиларимиз очко олишга интилишди.

- Жамоангизни майдонда бир киши кам бўлиб қолдирган Абдуазиз Султоновнинг сариқ карточкаларига эътирозингиз йўқми?
- Йўқ, у ўша вазиятда Жасур Ҳасановга нисбатан ўйин қоидасини бузганди. Ҳаммаси тўғри бўлди.