“Бунёдкор” футбол клуби сўнгги йилларда йўналишини ўзгартирган ҳолда тарбияланувчиларига жиддий эътибор қараётгани ҳеч кимга сир эмас. Бир неча йил олдин акалари олдида тўп тепган Суҳроб Иззатов, Расул Йўлдошев сингари ёшларимиз бугун жамоа етакчисига айланиб улгурди. Давом этаётган мавсумнинг ўзидаёқ Наримон Аҳмаджонов, Амир Тўрақулов, Улуғбек Кенжаев сингари тарбияланувчиларимиз бош жамоа либосини кийиб, расмий ўйинларда майдонга тушди. Жаҳонгир Ўрозов, Умид Султонов, Маҳмуд Маҳамаджонов каби ёшларимиз таркибдаги акаларига рақобатчилик қилаётганига бир мавсумдан ошди. Албатта, бу статистикалар чиройли ва барчани хурсанд қилади, аммо “Бунёдкор” академияси бундан кўпроғига қодир.

Хабарингиз бор, бир ҳафта муқаддам “Бунёдкор” футбол клубига янги раҳбар - Мурод Алиев директор этиб тайинланди. Мурод Боқиевич иш бошлаган илк кунидаёқ эътиборни академияга қаратди. Зеро, академия клубнинг эртаси ҳисобланади. Академия раҳбарияти, мураббийлари ва персонал ходимлари билан учрашиб, уларнинг фикрларини тинглаган Мурод Боқиевич амалга оширилиши шарт бўлган ишларни муҳокама қилди. Хусусан, мураббийларнинг салоҳиятини янада ошириш, машғулотлар вақтини об-ҳавонинг ҳолатидан келиб чиққан ҳолда белгилаш ва албатта футболчиларни танлаб олишда таниш-билиш, коррупция ҳолатларига йўл қўймаслик қатъий таъкидланди. Қолаверса, энди жамоаларга ўйинчи танлашда академия мураббийлар кенгаши аъзоларининг фикри ҳам инобатга олиниши маълум қилинди. Мураббийлар кенгаши таркибида шахсан Мурод Боқиевичнинг ўзи ҳам жой олган.

Саноқли ҳафталардан сўнг лигаларда мавсумнинг биринчи қисми якунланади ва жамоалар ёзги танаффусга йўл олади. Ўз-ўзидан ёзги давралар оралиғида барча жамоаларимиз таркиби кучайтирилади, албатта бу биринчи навбатда академиямиз тарбияланувчилари орқали амалга оширилади. Ўз устида ишлашни тўхтатиб қўйган ёки юлдузлик касалига йўлиққан болалар билан тарбиявий ишлар олиб борилади, лозим топилса уларга руҳшунослар бириктирилади. Қолаверса, энди болалар клубга фидойилик фалсафаси остида тарбияланади. Бугун болага яхши футболчи бўлиб етишиши учун барча шароитни яратиб берган клуб эртага бунинг мевасини олиши шарт! Бу замонавий футбол ва ҳаёт қонуни. Ота-она фарзанди болалигида борини беради, фарзанд улғайгач ота-онасига уларнинг меҳнатлари мевасини қайтаради.

Бугунги кунда Ўзбекистон миллий терма жамоаси сафида “Бунёдкор” аъзолари тўп сурмаётган бўлса-да, Сречко Катанец шогирдларининг аксари ўз вақтида академиямиз нонини еб катта бўлган йигитлардир. Уларнинг исми-шарифини ёзишга ҳожат бўлмаса керак. Гарчи миллий терма жамоада “қалдирғочлар” бўлмаса-да, қолган барча термаларимизда тарбияланувчиларимиз бор ва етарлича. Умид қиламизки, амалга оширилаётган ўзгаришлар самараси ўлароқ тез орада миллий терма жамоада ҳам “қалдирғочларимиз” бўлади ва бу Мурод Боқиевичнинг мураббийларга қўйган асосий талабларидан бири!

Бундан кейин “Бунёдкор” жамоаларида мураббийлар таркибга қўшиб олмоқчи ёки воз кечмоқчи бўлган футболчи бўйича мураббийлар кенгашига асос келтириши шарт! Боиси, бундан кейин “Бунёдкор” кимнидир шахсияти учун хизмат қилмайди, аксинча  бир мақсад ва бир фалсафа йўлида фаолият юритади!